Рэспубліканская дабрачынная акцыя для пажылых «Ад усёй душы»

Па ініцыятыве кіраўніка дзяржавы, агучанай на дабрачынным свяце, прысвечаным акцыі "Нашы дзеці", дадзен старт рэспубліканскай дабрачыннай акцыі для пажылых "Ад усёй душы".

Мэтай акцыі з'яўляецца прафява клопату і ўвагі аб старэйшым пакаленні, максімальнае ўцягванне школьнікаў і студэнтаў у пытанні аказання ім дапамогі і падтрымкі, развіццё міжпакаленчага фармату "ад дзяцей - пажылым людзям".

Для маладых людзей - гэта новы вопыт, які дазволіць праявіць свае лепшыя душэўныя якасці, а камусьці - вызначыцца з будучай прафесіяй напярэдадні прафесійнага свята - Дня работнікаў сацыяльнай абароны.

Акцыя арганізавана Міністэрствам працы і сацыяльнай абароны і Міністэрствам адукацыі сумесна з грамадскімі аб'яднаннямі "Беларускі рэспубліканскі саюз моладзі", "Беларуская рэспубліканская піянерская арганізацыя".

Сёння ў краіне больш за 120 тыс. адзінокіх пажылых грамадзян, якія асабліва востра адчуваюць патрэбнасць зносін і ўвагі ў навагоднія святы. Пры гэтым яшчэ каля 20 тыс. пажылых пражываюць у стацыянарных установах сацыяльнага абслугоўвання, а для 100 тыс. арганізаваны дзённы догляд і забаўляльная дзейнасць тэрытарыяльнымі цэнтрамі сацыяльнага абслугоўвання насельніцтва.

Асноўнымі мерапрыемствамі з 3 па 14 студзеня стануць віншаванні пажылых людзей ва ўстановах сацыяльнага абслугоўвання, бальніцах сястрынскага догляду, а таксама ў ходзе наведванняў дома. Адбудуцца сустрэчы старэйшага і маладога пакаленняў у фармаце чаявання, круглых сталоў, будуць арганізаваны канцэрты, тэатралізаваныя паказы і інш.

Асобная ўвага - доўгажыхарам, якія ў перыяд акцыі адзначаць свой юбілей. У краіне пражываюць больш за 400 чалавек, якія дасягнулі 100 і больш гадоў.

Павіншуюць нашых састарэлых не толькі дзеці і моладзь, але і кіраўнікі мясцовых органаў улады, дзяржаўных органаў і іншых арганізацый, дэпутаты. Пры гэтым далучыцца да гэтай добрай ініцыятывы зможа любы ахвочы.

У сістэме сацыяльнага абслугоўвання ў навагоднія святы традыцыйна праходзяць віншаванні пажылых людзей. У перыяд з 15 снежня па 2 студзеня ва ўстановах сацыяльнага абслугоўвання адбылося амаль 2 тыс. мерапрыемстваў (канцэртныя праграмы, святочныя чаяванні, навагоднія агеньчыкі і інш.), якімі ахоплена каля 50 тыс. грамадзян старэйшага ўзросту.

• За ходам акцыі можна сачыць у Telegram-канале Міністэрства па хаштэгу #ад_усёй_душы